Rezeki Dipetok Ayam
Cing Ato (Suharto)
* Aisyeh Menunggu Cinte
*Novel Betawi
Mentari sudah naik sepenggalan tombak, bocah angon udah pada buka kandang kebo, digetaknya kebo keluar kandang, kebo pun pada belerod menuju bulakan, bocah angon ngintilin rombongan kebo sambil nunggang kebo paling blakang, tubuh meliuk-liuk ngikutin iramanye tubuh kebo. Begitu juga baba Hasan babanya Mamat tidak ketinggalan. Baba Hasan amat getap pegi ke saweh, selepas solat subuh baba Hasan sudah nyiapin pacul, pedang dan tudung tapyonya.
“Dun, Abang pegi dulu,” ucap baba Hasan.
“Iye, bang. Ati-ati ye,” jawab nyak Hindun.
Nyak Hindun sibuk di dapur ngebersiin dan ngerapiin perabot dapur yeng habis dipake makan kemaren sore. Ujug-ujug nyak Hindun inget si Mamat. Nyak Hindun bangun dari duduknye menuju kamar Mamat.
“Astaghfirullah,…Bujug buneng tuh bocah masih molor udah gini ari” janggit nyak.
“Mat.. Mat…Mamat bangun udah apa tong, set dah budeg banget tuh bocah,” ucap nyak.
“Lu masih molor aje, meringkuk udeh kaye uler kadut,” ucap enyak lagi.
“Maaaaat,.. bangun noh liat matahari udah meletek, bangun entar enyak banjur nih,” ucap enyak sambil gembretan.
“Et, dah enyak ….Mamat masih ngantuk,” jawab Mamat sambil nutup mukenye dengan kain selimut.
“Lah tuh bocah bukanye dia bangun, malah narik selimut. Mangkanya tidur jangan sewaya-waya,” gentak enyak.
“Iya, Mamat bangun,” jawab Mamat sambil duduk di pinggir ranjang.
Sambil duduk matenye masih merem sementara tubuhnya goyang nganan goyang ngiri dan endul-endulan.
“Bujug busyet dah, masih ngejedog di ranjang aje, entar enyak plantong juga ni bocah, Sono buruan ke sawah susul Babaluh, bantuin babatin galengan, jangan lupa entu ketel bawa Sono,” bentak enyak.
“Iya, mandi dulu nyak,” ucap Mamat.
“Udah, nggak usah mandi, entar di sono ada kubangan kebo lu gupak dah ,” ucap enyak sambil ngedumel.
“Nyak, asal ngejeplakk aje, Mamat disamain ame kebo,” sangkal Mamat.
“Abisnya, enyak gedeg gini ari masih molor aje, kalau kate engkong luh dulu, kalo bangun kesiangan rezeki dipetok ayam,” ucap enyak sambil gerendeng.
“Nyak, gelasnya mana masa ketel doang, entar minumnya gimana?” Tanya Mamat.
“Udah dikokop aje,” jawab nyak.
“Hadeeeeh……cabuuuuut……,” gerutu Mamat
Mamat langsung ngeloyor pegi ninggalin rumehnye nyusul babanya ke saweh….
udeh dulu ye, enti kite sambung lagi….
pantun dulu ah….
Pergi Ke Saweh Sambil Pakai Kopiyeh
Mampir Dulu Di Rumeh Mpok Maryam.
Pantes Idup Luh Pade Suseh
Karena Rezekiluh Udeh Dipetok Ayam.
