Bueh Jatuh Nggak Jauh dari Puunnye
Cing Ato
bagian 2
Aisyeh Menunggu Cinte
Mamat ngeloyor pegi nyusuri jalanan setapak
Nyusulin babanya, kanan kiri jalan tumbuh rimbunan poon hingga terase adem. Sambil jalan sekali-kali kakinye depakin pentil manga yang jatuh dari poon gegara codot tadi malem gasakin magga.
“Mat….Mamat…mau ke mane?” Bakar gegeroan.
“Lah….kaye suare Bakar, tapi di mana batang idungnye, cuman gegaokannya gue denger,” ucap Mamat sambil tangak-tengok.
“Mat…..,” Bakar geroin lagi sambil ngumpet dibalik poon manga.
“Keluar lu Bakaaaaar….entar gue gibeng nih,” ancem Mamat.
“Waaaaaaaah…..,” Bakar nongolin kepalanye.
“Hehehehe………..,” Bakar cengengesan.
“Au ah gelap……..,” Cetus Mamat.
“Lu mau kemane Mat segale bawa ketel?” Tanye Bakar.
“Ke saweh bantuin baba babatin galengan,” jawab Mamat.
“Gue ikut Mat,” pinta Bakar.
“Ayo,……” jawab Mamat.
“Entar dulu Mat, gue ambil pancingan lindung,” Bakar lari ke rumehnye ngambil pancingan.
“Ok,….Mat gue bawa tige pancing,” ucap Bakar.
“Lah, satu lagi buat siape? Tanya Mamat.
“Buat sohib kite Mat, si Rojali juragan jambu,” jawab Bakar.
Berangkatlah Mamat dan Bakar ke rumehnye Jali.
“Jali…..Jali…..Jali …..main yu,” panggil Mamat dan Bakar.
“Lah, rumehnye sepi Bakar,” kata Mamat.
“Gue tau tempat nongkrongye,” kata Bakar.
Mamat dan Bakar pegi keblakang rumehnye Jali.
“Mat Luh liat no, makhluknye ade di poon jambu, persis kaye yeng di Ragunan, yu kite kagetin. Atu, due, tiga……..hayo luuuuuuh ketangkep,” teriak Mamat dan Bakar.
“Astaghfirullah, ……aduh kurang asem luh, gue kaget, gue teg-tegan ni jantung gue mau copot,” omel Jali sambil nepok-nepok dadenye.
“Lagian nangkring mulu ude kaye penghuni ragunan, turun… kite mancing lindung di saweh. Eh dulu, petik yeng banyakan,” ucap Bakar.
“Sekalian aje kite undu, hahahaha…..,” Jawab Jali.
Mereka bertiga sedang ngundu jambu, sementara babanya Mamat sedang nungguin Mamat bawa air minum.
“Ke mane si Mamat ya, uda waya gini belum yampe juga, jangan-jangan die ngelantur,” ucap baba Hasan.
“Aduh, gue ngasoh dulu deh di gubuk,” Kate baba Hasan lagi.
“Wow,……Jali ayo udeh kite ke saweh entar baba gue ngomel-ngomel,” kate Mamat.
Mereka berangkat ke saweh.
“Nah, no die batang idungnye udeh keliatan di pinggir kampung,” kate baba Hasan.
“Yah, yeng namanye bocah begitu tuh kelakuannye, kaye gue juga dulu ame engkongnye, enggak ngebuwang pisan, emang kate orang tue kite dulu, bueh jatuh nggak jauh dari poonnye,” kate baba Hasan sambil ketawe sendiri.
udeh dulu ye, entar kite sambung lagi..
pantun dulu ah…..
Makan jambu di rumeh bang Solihin
Ngambilnye di rumeh Bang Rojali
Jangan melulu anak disalehin
Sebab anak potret didikan kite sendiri
Cing Ato Betawi Cakung
