Pituah mandeh
Elok Dewi
Anak urang pai ka Lintau,
Pai ka Lintau jaan surang diri,
Kok pai buyung marantau,
Pandai pandai manjago diri.
Buruang pipik tabang malayang,
Hinggok di batang padi tangah sawah,
Elok elok dirantau urang,
Jan sampai awak mambuek salah.
Di musium banyak benda kuno,
Pai ka musium basamo kawan,
Jaan sampai marantau cino,
Indak takana kampuang halaman.
Takana dulu makan yo pinggan,
Makan basamo di tangah sawah,
Hiduik awak ko punyo aturan,
Jaan disamoan pamatangan yo sawah,
Hari Jumaik pai ka Sasak,
Dari Sasak Ka Bukiak Tui,
Sabara bana santiang awak,
Kok santiang jaan manggurui.
Pai Ka Bukiak tinggi basamo Akak,
Adiak ndak pai karano masih manyusui,
Sabara bana hebat awak,
Ka capek jaan mandahului.
Subana manih raso Lansek,
Dimakan anak rang Tarusan,
Kalau awak ingin mangeceak,
Dipikian dulu baru disampaian.
Anak uarang koto nan Ampek,
Pai ka sijunjuang mancari lansek,
Kalau awak ingin mangeceak,
Jaan lupo kato nan Ampek.
Balanjuang basamo makan di ladang,
Ladang didakeak gunuang Sago,
Jaan pernah awak tinggaan sumbayang,
Bia awak bisa masuak surugo.
Alah tabiak mato ari,
Subana tarang manjadi cerah,
Mangaji , Sumbayang yo sadakah satiok hari,
Bia hiduak awak indak barakah.
Alah barek taraso di mato,
Dibawo lalik subana sanangnyo
Dalam hiduik jaan baduto,
Bia urang ka awak picayo.
Dari padang pai ka puncah mande,
Tibo disinan badan kurang sehaik,
Ingaek taruih pituah mande,
Bia salamaik dunia akhiraik.
Padang, 13082022.
